Garo Hills-o chi bana ong·angani somoio neng·nikanio chagronggipa kangal cholgrirang sorkarioni dakchakaniko batanggimin changrangonin man·a nangkuenganiko janapate Tura MDC Bernard Marak a·dokni skotong Minister Conrad Sangma-na chitti sedoataha. Gam-jin, nok-jam aro a·a chiarangko nisiatako man·gipa nokdangrang dakchakaniko man·a nangkuenga, mitamrangde PMAY nok aro ration card-koba man·tokkuja ine Marak parakataha.
Sorkari dakchakaniko on·engon Aadhaar-ko jakkale duko ga·akgipa sakprakna gamenggipako sokataniko nikchangenga. Mitam official-rango Aadhaar aro bank account-ko gapatanian dongja jeni a·selan man·sona nanggiparangona sokangjaenga ine Marak talatangaha. Neng·nikanio ga·akgipa nokdangrangni bidingoba songni manderang tal·e sing·e ra·e ru·utgijani somoio CM-na sokatangna miksonganikoba Marak aganangaha. Da·o dipet nisiatgiminrangko taripiltaianiko dakujaenga ineba Marak parakangaha.
Manderang korosrangna dakchakaniko a·dok ge·antina on·gimin PM Relief Fund-o galatgenchimoba Meghalaya a·doko man·gnirangko nokdangrangni man·ako nikna neng·ronga. Ia chang chi dal·anichi bang·a bolrangni dolongrangko RCC tarina songgigrikgimin kamrangko ka·jani a·sel man·pakangaha. Unbaksana, songrango PMGSY ramarang aro dolongrangko tarigija galchipanikoba Marak janapataha. Ia ramarangko nirokani somoirang badikujani gimin CM-ko ua ja·ku ga·china mol·molangaha.
