Batanggimin salrango Garo Hills-o chi bana ong·e nokjamrang nosto ong·e neng·nikanio ga·akgipa nokdangrangna manderangni ka∙sae flood relief-na on·gilatgiparangko Meghalaya Pradesh Youth Congress (MPYC) ni Vice President Timjim K Momin mittelpilskaaniko dakangaha.
Indake krimkro ong∙e dakchakanichi bang∙a duk mikchio ga·ake neng·nikaniko man·enggipa nokdangrangna ka·donganiko aro namdapaniko ra·baaha ine Momin aganangaha.
Flood relief-ni bosturangna agreba manderangni ka∙sae on·gilanio tangka paisa gong 1,26,970 ko man·soanichi bang∙a nangchongmotgipa bosturangko breskana man·aha ineba Momin agandapangaha.
Indake songsal baksa apsan bakrime namgipa kamrangko ka·anian dingtanganiko ra·bana man∙aha ine MPYC-ni Vice President mitelan baksa aganangaha.
