Da∙al salni bako West Garo Hills a∙jani dingtang dingtang sorkarini department rango kam ka∙giparangna District Administration nigita DRDA Conference Hall-o Right to Information (RTI) Act 2005 ni bidingo talate on∙angaha. Ia salsana ong∙atgipa programo uamang maikai manderangni u∙ie ma∙sie ra∙na nanggiparangko RTI Act ni on∙gimin niamrango pangchake ja∙rikna man∙an baksana ia Act ko name dake jakkalchina u∙iatani ong∙a.
RTI Act nigita India a∙songni manderangna nangchongmotgipa u∙iatanirangko sorkarina kam ka∙enggiparangoniko bi∙ani bil donga jekon sal 30 ni gisepon aganchakaniko on∙a nanga ine parakataha.
Ia programo, RTI Act 2005-o pangchake manderangni ja∙rikna nanggnigipa niam aro ka∙na nanggipa kamrangni bidingo West Garo Hills-ni Additional Deputy Commissioner S R Marak talatan baksana Appellate Authorities ni kamrangko janapangaha. Una agreba RTI-na dorgasto galani niamrangko aro Appellate Authority ni kamrang jean onbatgipa gadangni kacharini rai on∙ako ong∙nikjae chubatgipa kachario kakketgipa bichalko rai on∙china ka∙gipa ong∙a ineba Marak agantalatangaha.
RTI website-ni bidingo bakroe talataniko West Garo Hills District Information Officer incharge NIC, Tura Elliber A Marak on∙ange department rango kam ka∙giparangni u∙ianiko mangrakbatatna aro uamangni kam ka∙anirangko namdapatna Marak agandapangaha.
