Voice of the People Party (VPP) ge∙sa regional ba a∙doko bikotgiparangoni political party ong∙e mikkangchi uamangni party ko bilakbatroroatna Garo Hills-onaba ra∙bana miksonganirang dongenga ine National People’s Party (NPP) ni dilgipa aro Cabinet Minister parakataha. Iako aganengon, regional party rang bang∙bata changon gipin partyrang baksa bakrimgija dol dakani a∙selo a∙dokni silroroaniko champengrongani gimin politics-o apsan bakrime aro nangrime kamrangko ka∙na nanganiko Lyngdoh janapangaha.
VPP rangni party-ko dal∙batatna miksonganiko darangan champengnagita man∙ja aro uamang an∙tangtangni dakna nanggni kamrangko jakgitel ong∙en ka∙na man∙a. Indiomangba indake a∙dokni gipin bakrangona party-ko apalbatatna miksonganio bang∙bata changon saksa sakgipin baksa bak dakgrikani ba meligrikgijaniko ra∙abaniko nikangna man∙angaha jekon batanggimin Parliamentary election-oba chagrongangaha ine Lyngdoh aganangaha.
Political partyrangni bakrimgija kam ka∙anian a∙dokna bilonggen gimaaniko ra∙baa maina regional partyrangni gisepo meligrikgijanirang gnang jekon batanggimin bilsirango UDP-ni kam ka∙ani bewaloba nikangna man∙angaha. Indakgipa obostarango pangchake a∙doko political partyrangni gisepo ge∙sa ge∙gipin party-ni kosako ma∙ekatgrikaniko dakgija apsan melie bakrime kam ka∙na nangchongmotaniko Lyngdoh agandapangaha.
