SWGH, Ampati-o seoka man·gipa cook cum helpers rangna PM Poshan scheme-ni ning·o bijak songsusaaniko Sub Divisional School Education Officer (SDSEO) multifacility centre-o ong·atangaha. Iano bakko ra·na chu·gimik ge 10 skulrangko seokaha jeon Upper Primary aro Lower Primary skulrangoniko sak 5 prak ra·e songsusaataha.
Susaataniko dingtang mancha uamangni changa sapaniko mesokan baksa song·a channaniko skie ra·e u·i ma·sigiminko chimonge jakkalna man·agita miksonganio ong·atangaha. Bakko ra·giparang ia somoio an·tangtangni ma·sigiminrangko saksa sakgipin baksaba agangolpogrike tale ra·na cholko man·angaha.
A·jani DC, Hema Nayak mongsonggipa ong·e tom·anio aganengon bi·sarangna namgipa cha·ani ringanirangko on·a cook-rangni gamchatgipa kamko rasong de·e janapangaha. Bi·sarang cha·a ringa gri ok bangbango skulrangchi re·baenga ine DC aganangaha.
Songsusaanio skanggipa biapko Chigitchakgre Government L P School-ni Joshina M. Sangma, gnigipako Ampati Songittal SSA L P School-ni Balmonthy D. Marak aro gittamgipako Ampati U P School-ni Rita Koch man·angaha. Chegiparangna Deputy Commissioner-ni jakchi boksisrangko pakwatangaha.
