West Garo Hills a·jani DC Jagdish Chelani, pu·onani tarikko ECI-ni parakatani ja·mano Gambegre by-election ko tom·tome aro name matchotatna man·agita adita beng·anirangko ge·etangaha. Chong·motan, sorkarini aro manderangni bagan bario nokgipani on·a donggija pakmarango sena, poster tapna, cutout-rangko songna, banner, hoarding, sticker aro flag-rangko potpajachina u·iatangaha.
Gari gorarango District Election Officer ba Returning Officer-oni hukumko ra·gija campaign-na jakkalgijagiparango party-ni sticker-rangko tapjachina aro flag-rangko songdojachina champengataha. Apsandake Silchidarekoba ra·bitjachina aro gopretnagipa bosturangko a·jao ra·rurajachina DC u·iataha. Silchidare jakkalgipa manderangko ua sepangbatgipa pulis thanarangona licence-rangko ta·rake on·e donepachina didiataha.
Ia ge·etgiminni bidingo saoba licence gnanggipa slaiko ra·pilna sikgenchimode Deputy Commissioner-na see janapchina u·iatangaha.
