Garoland State Movement Committee (GSMC), CEC Headquarters Tura, NH51 Rongkon-o donggipa biaprangko rama tarina cho·anio man·gnirangko tiktak dake on·gijaenganina a·a nokgiparangni jegalaniko nirokatchina WGH-ni Deputy Commissioner Jagdish Chelani-o mol·molataha. Land Acquisition, Rehabilitation and Resettlement Act 2013-ni Right to Fair Compensation and Transparency-ni gitade a·a nokgiparangna gamna nanganirangko tiktak ong·e on·a nanga ine GSMC dolrang aganangaha.
Project-ni kamrangko a·bachengna skang name dake a·arangko toe nianiko dakchina, a·a nokgipani man·gnirangko tiktak dake on·china aro LARR Act 2013 o dongimin niamrangko ja·rike dakchinaba GSMC dolrang janapangaha. Una agreba Nakam bajar oni Dobasipara-ona re·gipa ramarango traffic jamrangni somoio apchangkete neng·nikanirangko man·ronganina NH51 project-o man·chapatchinaba GSMC dolrang aganangaha.
Ia project-rangko name dake ta·rake matchotatna man·a gita a·a nokgiparangna uamangni dabianiko knachake man·gnirangko on·china GSMC dolrang Deputy Commissioner-o mol·molangaha.
