South Western Zone, AHAM dolrang Mahendraganj Baksalpara-ni College of Science and Commerce, Ampati aro Kebolpara-ni Engineering College-ko rika cho∙anirangko ru·uta somoirangna matchotgija galchipe donanina Chief Minister Conrad Sangma-na memorandum-ko on·angaha.
Ia college-ko a·bachengatnagita November 22, 2017 tarikon Dr. Mukul M Sangma-ni jakchi pangchakani ro·ongko songe on·angaha. Ru·utgija salrangna skang ia college rangni rika cho∙anirangko re·ange nirokeaniko dakon kam ka·gipa manderangni chu·onggijani, jakkalani bosturang aro kam ka·anirangko niroktimgipani donggijaniko nikna man·aha ine AHAM dolrang aganangaha.
Ia college-ko galchipgija ta∙raken matchote rike on·genchimode SWGH a·jani aro wilwilao donggipa chadamberangna jerangan Commerce, Science aro Engineering-ko poraina gisiko sikani donggiparangna namgipa cholrangko ra∙bana dakchakani ong·genchim ine AHAM dolrang janapangaha.
Ia bida pakwatchakram a·damrangko a∙bachengate on·anichi poraia skianiko tang·doatanisan ong·aigija, songdongenggipa chadamberangnaba kamrangko ka·e cha∙na dakchakani cholrangko ra·baaniba ong·gen ineba AHAM dolrang agandapangaha.
Ia pilak kam ka∙na nanggnirangko nirokate mikkangchi chadamberangna nambata cholrangko ra·bana man·agita ia college ge∙gnini rika cho∙anirangko ta∙rake matchotate on·china South Western Zone AHAM-ni President Wester G Sangma Chief Minister Conrad Sangma-o mol·molangaha.
