Da∙al salni bako NPP dolni gita Gambegre bye-election o susanasienggipa Mehtab Chandee A Sangma nomination file ka∙angaha. Ia somoio Sangma-na bakrimpaaniko mesokna uni segipa aro Chief Minister Conrad K Sangma, uni ma∙gipa Soradini A Sangma, Power Minister A T Mondal, PHE Minister Marcuise Marak, Bajengdoba-ni MLA Pongseng R Marak, MDC rang aro una chakpagipa manderangba re·bae bakko ra·angtokaha.
Gambegre by-election-o chena ka∙dongsoenganiko kobor ra∙timgiparangni sing∙aniko dakon, election susaanio bang∙a changon dingtang bewalrangko chagrongna man∙ronga indiba manderangni una ka∙saaniko nike chenagita ka∙dongsoenga ine Sangma aganchakangaha.
Ia election o chena man∙ode mai mai dakgipa dingtanganirangko ra∙bagen ine sing∙on, Gambegre o manderangni janggi tanganio nangchongmotgipa man∙a nanggiparangara re∙na doanio namgipa rama jal∙angrangko tarichengna manchianiko janapangaha. Unbaksana ua saksa doctor ong∙e sanna bannani a∙damko nambatatna aro gipin rika cho∙anirangko nirokatchenggen ine agangangaha.
