South Garo Hills, Chokpot C&RD Block-ni BDO, Chokpot Unit-ni Garo Students’ Union (GSU)-ni President aro Secretary-ni kosako saksa kobor ra·timgipa ba freelancer an·tangko ka·mikkenatanina NGH-ni Police thana-o badi ka·doangaha.
Ia ong·a obosta battanggimin salrango mikka jimbee waanichi Chokpot Tengki Badima jolo chi bana ong·e bang·a nokjamrang nisiatako man·gipa nokdangrangko re·ange grongenba adita sing·sandianirangko dakani bidingo ong·aha. Uni sing·anio ua adita ma·giparangko sorkarioniko maiba dakchakaniko man·ani gimin sing·sandianiko dake news channel-o gatataha. Tatu Marak saksa freelancer ong·a jekon ua ma·giparangko sing·anio maming taridapa ba on·dapa dongjaha ine parakataha.
Kobor-rangko parakatgipao ma·ming namgijako on·dapa aro agana dongjagenchimoba uamangni kenbegnigipa kattarangchi ka·mikketanian an·tang janggina kenani ong·enga, maina uamang South Garo Hills a·jao bil gnangbegipa manderangba ong·a ine Marak aganangaha. Uni gimin ia manderangni kosako ta·rake sing·sandie ja·ku ga·enba niamko pe·anina kraa bichalko on·china Resubelpara-ni Officer incharge-o mokordomako ka·e mol·molangaha.
