Meghalaya a·dokni manderangko kenani aro jajrengna nanggipa obostarangoni chel·chakna a·dok sorkari Meghalaya Residents Safety and Security Act (MRSSA) 2016-ko a·doko ra·gatna funds ba tangkarangko a·jatangtangni District Task Force-rangnigita Deputy Commissioner-ni jako pakwatna scheme-ko tariangaha.
MRSSA-ko ra·gatna District Task Force-ko songangaha jeon Chairperson Deputy Commissioner ong·gen aro Additional Deputy Commissioner ba Assistant Commissioner-ko Secretary-ni kamna donskaaha. Task Force-ni gipin member-rangko Superintendent of Police, Supply Inspector, Labour Inspector, Infiltration branch-ni Inspector, Anti Infiltration Directorate, Autonomous District Council-ni dilgiparang aro sakgni sorkarini mande ong·gijagipako donangaha.
MRSSA 2016-ko ra·gatani miksonganiara Meghalaya-o nok para ra·e dongenggiparangni ja·pang ja·dilko sandina, a·doko napdrabae songdongna am·enggiparangni jingjengataoniko chel·chakna, tom·tomaniko ra·bana, District Task Force-rangko bikotna aro facilitation centre-rangko kulina ra·baaha. Unbaksana, niamrangko tarie a·dokni manderangko pilak sosojengjeng kamrangoni aro kenbegnirangoni naljoke rakkina MRSSA-ko ra·gatna tik ka·aha.
