Da·al pring 6 bajimango South West Garo Hills, Boldamgre songni manderangni joltangko nirikkianiko dakengmitingo Bangladesh a·songoni napsrukbaenggipa saksni manderangko rim·aha. Ia manderangoniko Bangladesh-ni tangkarang, mobile phone, passport aro sim card-rangko man·aha. Rim·a man·gipa manderangko Kalaichar police dolrangna pakwatangaha aro Mahendraganj police thanao mokordomako segatangaha.
Bangladesh a·songoni rim·a man·gipa saksnini bimingrangara Angur Hussain Afrib (20), Amir Ali (35), Chand Miah (60), Md. Bukul Mia (32), Mir Jahan (45) Biblop Miah (35) aro Md. Rasel Ali (35). Ia manderang Bangladesh-ni Kurigram District-ni ning·o dingtang dingtang biaprango sondonggiparang ong·a. Napsrukbaenggipa Bangladesh-ni manderangko rim·na BSF aro Meghalaya police dolrang krenge nirikkianiko dakenga jeon songni nokni manderangba bakrimpaaniko on·enga.
Batanggimin September 27 tarikoba sak 10 Bangladesh-ni manderangko rim·aha. Apsandaken October 8 tarikoba Boirakupi Zikzak jolo kakketgipa koborrangko man·e niam gri napsrukbagipako rim·na man·aha. Songni nokni manderangkoba ia obostarangko chagronganirang batroroenganina chanchipani ba maikoba ma·sigenchimode BSF aro Police dolrangna u·iatchina ge·etataha.
