Gambegre bye election-na NPP-ni nok ge∙antiona re∙e campaign ka∙anian Congress dolni cheaniko mesokenga: Saleng

Gambegre bye election-o Congress party an chegipa ong∙aniko niksamsona man∙enga ine Tura-ni MP Saleng Sangma kobor ra∙timgiparangna ka∙donge parakangaha. Gambegre constituency-ona Chief Minister, dingtang dingtang minister-rang aro MLA rangni manderangni nok ge∙antiona re∙ange campaign ka∙e vote rangko biamaniko nikna man∙enga ine Sangma parakataha.

Chief Minister-ni dingtang mancha nok ge∙antiona re∙ange campaign ka∙aniko uni constituency tangon nikna man∙kuja indiba ia chango Gambegre gita dakgipa constituency-ona ua an∙tangan re∙bae indakgipa kamrangko ka∙enga ine Saleng Sangma aganangaha. Ia chango Chief Minister-ni jikgipa saksa candidate ong∙e susaanichi pilak minister-rangba Gambegre-ni nok ge∙anti aro song ge∙antiona re∙bae manderangni neng∙nikaniko ma∙sie ra∙anian aiao inmanpilgipa ong∙a ineba Sangma parakangaha.