North Eastern Hill University (NEHU) ni Vice Chancellor Prabha Shankar Shukla, NEHU ni Registrar Omkar Singh aro Deputy Registrar Amit Gupta ko kamoniko ra∙galna NEHU Students Union (NEHUSU) aro NEHU Teachers’ Association (NEHUTA) dabianirangko ra∙chakna amjawa ine jegalangaha.
NEHU ni Registrar aro Deputy Registrar ko niamo pangchake aro Selection Committee jeon SC aro ST oni memborrang dongpae interview ko ong∙atesa seokani dakangaha. Ia seokanio Vice Chancellor ni maming bak dongpaja aro uamangko seokani somoioni bilsisa ong∙angpilaha. Uamangni kosako matnanganirang donggenchimode kamona rimnapchengani somoionin jegalna nangachim ine Prof. Shukla aganangaha.
Iani bidingo NEHUTA, NEHUNSA aro NEHUSU a∙dok sorkari aro India ni President na chitti ko sedoataha. A∙dok sorkari Registrar aro Deputy Registrar ni kamrangko ong∙e nikja ong∙ode committee ko ra∙gate iani bidingo am∙sandianirangko dakna bil donga indiba NEHUSU ni Officer on Special Duty (Director, College Development Council) aro Guest House ni In-charge ko kamoniko ra∙galna dabienggiparangko chu∙sokatna man∙jawa aro Ministry ba President ni Office oni uamangko kamoniko ra∙galna ge∙etanirang dongkujaenga ineba Prof Shukla aganangaha.
College Development Council ni Director ni kamna bang∙a professor rangko grongaha indiba saksa mangba ia kamko ka∙na ra∙chakna skanirang dongja. Guest House ni In-charge ni kamna da∙o dipet non-teaching staff ni kamna manderang chu∙ongjaenga maina non-teaching staff ni kamna rimnapaniko National Testing Agency jako ra∙jani a∙sel gipin agency rangni jako da∙o Registrar ni office ko chatro chatri rangni jingjengataniko dontongani ja∙mansa kamko a∙bachengatanggen ine aganan baksana Guest House ni In-charge ni kamni bidingoba niatgen ine Prof. Shukla parakangaha.
Pro-Vice Chancellor ko Tura aro Shillong Campus o rimnapani gimin Prof. Shukla an∙tangan Education Ministry na chitti ko sedoataha aro ia bilsi ni December jao-na kingking maming kobor dongkuja ong∙ode sakgni Pro-Vice Chancellor jean jat gittam oni-ko kamna seokaniko dakanggen ine Prof. Shukla agandapangaha.
