North Eastern Hills University (NEHU) o poraienggipa chatro chatrirangni sal wal jingjingatani aro media-rango gatatenggipa koborrangko niksoani ja·mano ma·mong sorkarini Ministry of Education pilak ong·enggipa obostarangko nirok sandina sakgni member-rangko seoke committee-ko bosaina tik ka·angaha. Iamangoni saksa University Grants Commission (UGC) chairman Prof. D P Singh aro sakgipin Assam University-ni gitcham vice chancellor Prof. Dilip Chandra Nath ong·a.
NEHU-ni bang·a neng·nikanirang jekai NEHU-ni rank tang·onani, niamgri kamrango rakkiani, rika cho·aniko nichangani aro VC-ni daitotangko name ka·jani bidingo Education Ministry-na janapataha. Niamni a·palo mikkang nitea gnang Omkar Singh-ko Registrar-na aro Deputy Registrar-na Amit Gupta-ko kamo rakkiani giminba Ministry-na u·iatangaha. Iarang pilakan chonchongipa aro nangchongmotgipa kamrangko nikchange donani a·selo poraia skianio, aro chatro chatrirangni gisepo neng·nikanirangko ra·baenga ine Education Ministry aganangaha.
NEHU-o ong·enggipa obostarangko nirok sandina rakkigipa inquiry committee-ko Education Ministry sal 15-ni gisepo sosojengjeng ong·aniko namatna ku·pattianirang aro cholrang baksa report-ko on·china ge·etataha. Ia somoio NEHU-ni official-rangkoba committee baksa bakrimpae nanggipa lekka pancharangko on·china aro uamangko dakchakchina aganangaha.
