Jabolrangko basee galaniko didina aro baikamgipa cholko bikotna South West Garo Hills a·jani District Administration aro District Tourism Department bakrime cleanliness campaign-ko a·bachengate school-rango, tourist a·damrango aro gamchatgipa biaprangna kalbongrangko sualangaha.
Ia program-ko da·al salo DC office-ni DRDA Conference Hall-o ong·atangaha jeon Deputy Commissioner Hema Nayak mongsonggipa ong·e bakko ra·angaha. Unbaksa, Additional Deputy Commissioner, BDO aro District Administration-ni gipin officer-rangba ku·cholsan ong·e ia kamna re·mikkangna program-o dongangaha.
Campaign-ni mongsonggipa miksonganiara a·jani manderangko jabolrangko name galchinagita ranta ka·aniko ra·bana dakenggipa ong·a. Tourist a·dam, school aro mongsonggipa biaprango kalbongrangko donna on·anichi rongtal an·talani namgipa bewal are samtangtango donggipako name rakkina daitoko gisik ra·atani ong·a.
Ia campaign-ni bako, sojronggipa aro sogijagipa jabolrangko ma·eke galnagita didina kalbongrangko bang·a biaprango donanggen. Iako dakanichi jabolrangko skatang galaniko komiatna aro jakkalpiltaitaiani rantako a·jao manderangni gisepo ra·bana ka·dongsoenga.
