West Garo Hills, Rongram Block-ni ning·o donggipa Chibra A·gal songni Chief Minister Youth Centre-o a·dokni dam 22 Center-rang gnigipa changna exhibition-ko mijal salo ong·atangaha. Ia exhibition ong·ataniona Chibragre songni Nokma mongsonggipa sokgipa ong·e bakko ra·angan baksana chu·gimik sak 100 nigita pilak bilsini manderangba dongpae bakko ra·angtokaha.
Chief Minister-ni ia center-ko a·bachengate on·anichi songdongenggipa chadamberangna janggi tangani cholrangko namdapatani giminba songni Nokma jinmana aganangaha. Ia exhibition ong·atanio ge 8 project-rang jekai sol·a repani, Crochet-ni kam, cake-rangko tariani, jaktangchi tarigipa dingtang dingtang bosturang, sabon tariani, macrame bag, sika koani aro resin craft tarianirangko mesokangaha.
Chief Minister Youth Centre, ian dingtang mancha Self-Designed Learning (SDL) ko skie ra·na gita bakko ra·giparangna jakgitel ong·e uamangni changa sapanirangko namdapatna dakchakaniba ong·enga. Ia exhibition-ko ong·atanichi skie ra·enggiparangna uamangni changa sapaniko aro u·ia ma·sianikoba namdapatna namgipa cholrangko on·aniba ong·enga.
