A·chik Conscious Holistically Integreted Krima (ACHIK) dol North Garo Hills Dainadubi jolo gipin jatrangni bading chiwalaniko dakenggiparangni bidingo nirokatchina GHADC-ni Land Revenue In-charge Nikman Ch. Marak-ko gronge nirokatchina mol·molangaha.
Uamangni nikanio Dainadubi jolo bading chiwalenggipa gipin jatrang GHADC-ni dongimin niamgita licence donggija daktokgiparang dongnaba gnang ine ACHIK dol parakangaha. GHADC-ni Deputy CEM Nikman Marak jean Land Revenue-ko jako ra·engani gimin Dainadubi jolo non-tribal rangoniko trading licence-rangko name nirok sandianiko dakchina uamang janapangaha.
Iarangko dakanichi niamko ja·rikaniba ong·gen, songdongkamenggipa jatrangni dake cha·pagniko naljokatan baksana bading chiwalanio kakket ong·aniko ra·bagen ine ACHIK dolrang parakangaha.
