WGH, Betasing block-ni ning·o donggipa Hathisil Garment Manufacturing Unit-o exhibition aro bosturangko palaniko a·jani Deputy Commissioner Hema Nayak oprake on·angaha. Da·alo ia unit-o joltango man·gipa bosturangoni jaktangchi tarigipa ba·rarangchi dingtang dingtang tarigimin ganding chindingrangko palangaha.
Program-o sokbagiparangna aganengon, DC Hema Nayak, jolni manderangko mongsongbate me·chikrang aro chadamberangko ia karkanao napchina ku·pattiangaha. Ua dingtang mancha ia karkanao nape, kamrangko ka·e cha·na aro janggi tangani cholrangko bikote on·a amaniko talatangaha.
VA Silk Industry-ni nokgipa Vivien Sangma, ia unit-o training program-rangko on·ani jekai koani, rate bimang tariani, weaving aro loinloom-ni gimin skie on·aniko u·iatangaha. Uamangni bikotgimin ba·rarangchi gipin cholrangko jakkale jatni ganrong bewaloniko ra·e ganding chindingrangko gital dake taria. Sangma, uamangni neng·nikanirang jekai kam ka·giparangni re·rurana neng·nikaniko janapangaha jekon sorkari nirokatna aganangaha ine ua parakangaha.
Ia unit, gitchambegipa kilding skani ba loinloom weaving-ko ra·bapiltaian baksana bang·a manderangna kamrangkoba ra·bae on·aha. Unbaksana, ian chasongna jakkalbaenggipa ska koaniko ripinganiba ong·a jeon kamgri ong·aniko komiatna aro janggi tangani gadangko namdapatna dakchakaniko on·a.
