Shilong jolni bida pakwatchakgipa a·damrango Garo skigiparangko rakkina deficit aro sorkari post-rangko tarie on·china A·chik Conscious Holistically Integrated Krima (ACHIK) dolrang Education Minister Rakkam Sangma-na chitti seachi janapataha.
Shillong ge·sa a·doko namgipa aro mingsinggipa bida ra·chakram biap ong·e Garo chatro chatrirang bang·beoba A·chikkuko sapgipa skigipa komianiko ACHIK dol parakataha. Ian Garo ku·sikni mingsa a·dokni official ku·sik ong·aniko nichanganisan ong·aigija chatro chatrirangnaba skia man·ani cholrangko bakandikatani aro jatni dakarikao pangchakna man·gijaniko ra·baa ine ACHIK dol aganangaha.
Garo ku·ko a·dokni official ku·sik ong·aniko bida pakwatchakramrango mongsongbate Shillong songjinmao curriculum-o A·chikkuko ra·napna nangchongmotaha jekon sapgipa skigiparangko Shillong jolni bida pakwatchakgipa school aro college-rango deficit aro sorkari post-rangko bikote Garo teacher aro lecturer-rangko rakkianichi namdapaniko ra·bana man·gen ine ACHIK dol u·iatangaha. Skigiparangko gisik nangatna workshop aro training program-rangkoba ong·atchina, unbaksana chu·ongagita cholrangko on·china uamang janapangaha.
