East Garo Hills a·jao tourism-ni a·bao tang·doaniko ra·bana Nongalbibra Tourism Society, District Administration baksa bakrime Simsang chibimao river rafting trial run-ko da·al pring Williamnagar songjinmaoni a·bachengataha. Da·alo uamang Williamnagar-oni re·chakate Nongalbibra-ona joljol simsang chiko ring choe songreanggen. Ian sal bri walgittamna ong·nasienggipa ong·a jeon tourism-ni a·bako namdapatna man·gipa aro dingtang dingtang kal·ani ba a·jana namgniko on·agipa biaprangko uamang nie ra·angjolgen.
Ia trial run chu·sokgipa ong·genchimode Williamnagar Garo Hills-ni rafting map-o napata man·anggen ine a·jani DC Vibhor Agarwal parakangaha. Ua dingtang mancha ia salko a·jani itihaso gamchatbegipa ong·aniko parakange tourism-nasan ong·aigija sports-ni a·banaba namgniko ra·bagen ine aganangaha.
River rafting-ko a·bachengatanichi tourism-ni a·bako tang·doatasan ong·aigija a·jani manderang baksana gipin a·songonikoba gisiko nange re·baatna man·gen. Iarangko a·bachengna man·genchimode chadamberangna kal·anirango bakko ra·na dakchakgen. Ia re·mikkanganiko gisiko nange District Administration sorkarini dakchakani am·anggen aro tourism society baksaba sports aro tourism-ni a·bako tang·doatna kam ka·anggen ine DC aganangkuaha.
