Bristibar sal November 21 tariko South West Garo Hills, Rerapara C&RD Block-ni ning·o donggipa Indik Nokat Baptist Church Compound-o songrango an·seng baljoke donganiko namdapatna free health screening cum Village Health Council (VHC) ni tom·aniko ong·atangaha. Ia programko Health Department, ICDS, Education Department aro MSRLS nangrime Indik Nokat songko namdapatna miksonge ong·atangaha.
District Health Society-ni ong·atgipa program-o songdongenggipa manderang aro official-rangni bimchipe bak ra·aniko nikna man·angaha. Rerapara C&CD Block-ni BDO Armand Momin mongsonggipa sokgipa ong·e, an·seng baljoke dongani gamchatani aro ICDS, MSRLS scheme-rangni namgnirangkoba agane on·angan baksana Village Health Council (VHC) rangko tom·anirangko dakronge an·seng baljoke dongani gimin mande sakantinan u·iataniko dakjringnaba didiangaha.
Sanna re·bagipa manderangko porikka ra·e nianiko dakon uamangni be·eno an·chi chu·ongjae miksule saa man·gipa ma·giparangko bang·en ma·sina man·e ia sabisiko champengna ta·raken sanna bannaniko ra·na nanganiko DMCHO-ni Dr. Lydia Marak aganangan baksana sagipako nokdangni maikai simsake rakkie nangan somoio uamangko hospital ona rimnapna nanganikoba u·iatangaha. Sanna bannaniko dakgipa dolrang malaria, tuberculosis aro konchi saanirangko champengna biji suna dakchinaba mikrakataniko on·angjolaha.
Songsalo poraia skianiko namroroatna ia chasongni chadamberangko poraia skianiko gamchatnike aro skanggipa done mikkangchi niksenggipa ong·na tikkelna nanganiko West Garo Hills-ni SEO T. Ch Marak didiangaha. Una agreba Self-Help Groups (SHGs) dolrangna aro Village Revolving Funds (VRF) dolrangni songrango dal·roroataniko on·a kamrangko ka·angenganikoba DMM, MSRLS parakangaha.
Indik Nokat songo mande jelani gimik 203 ong·e indin sanna bannaniko dakanio 72% nigita program ko ong·atanio matchotatna man·aha. Ia programko ong·atna DMHO aro District Health Society-ni Secretary Dr. H. Barman-ni dakdilanichi a·bachengatna man·angaha. Ia kamko chu·sokatna Village Health and Nutrition Day (VHND) aro Village Health Council-ni tom·anio District aro Block dolrangni pangnan re·ange gronganiko dakanichi chu·sokna man·angaha.
