Gambegre bye-election o Chief Minister Conrad Sangma-ni jikgipa aro National People’s Party (NPP) ni Dr. Mehtab Chandee A Sangma baksa susagiparangoni Trinamool Congress (TMC) ni Sadhiarani M Sangma-ko 4,594 vote-rangchi bate amataha.
Ia susaanio NPP dol-ni Dr. Mehtab Chandee A Sangma election-o skanggipa changna susaaniko dakgenchimoba chu·gimik 12,678 vote-rangko man·aha. TMC dol gittamgipa changna Gambegre-o susaaniko dakgenchimoba chu·gimik 8,084 vote-rangko man·e gnigipa ong·aha.
Batanggimin bilsirango Gambegre Constituency-ko Congress dol dilgenchimoba ia election-o Congress-ni Jingjang M Marak 7,695 vote-rangko man·e gittamgipa biapkosan man·skaaha. Apsan daken Bharatiya Janata Party (BJP) ni Bernard N Marak ia susaanio 1000 vote-onaba sokdona gita man·jaha.
Ia bye-election o cheanian Chief Minister Conrad Sangma-na politics-ni a·bao changsatai cheani rasongko ra·baaha. Ia bye-election ko Congress-ni MLA ong·e dongengipa Saleng Sangma-ni Tura-ni MP seat-ko cheangani ja·mano ong·atna nangao ga·akaha.
