SGH Moheskola PHC-ni Dr. Bryan K. Sangma-ko, kamona ra·bachipgija daitotangko nikchange ru·utbea salrangna dongenganina songdonggipa manderang DM&HO Dr. Feroz R. Marak-na uamangni kusi ong·gijaniko parakangaha.
Doctor dongjani a·selo saenggipa manderangna somoigita samrangko on·a man·jaenga aro saknaanirang namjabatrorona nangaona sokenga. Sanna bannaniko ra·na gipin biaprangona re·na nangskae somoi aro tangka paisanigita neng·nikaniko man·aniko DM&HO-na uamang u·iatangaha. Unbaksana, ia a·selrangko chagrongna nange sanna bannaniko on·enggipa cholrang aro adamrango ka·donganiko komiata ine songni manderang aganangkuaha.
Ia pilakko nigrike songni manderangni neng·nikanirangko niroke Doctor-ni kam ka·anirangko nipile kraa ja·kuko de·china aganangaha. Uni dongjamiting somoio sanna bannaniko ra·na gipin medical staff-ko dikdiksani somoina on·chengchinaba uamang didiangjolaha.
