North Garo Hills ni Chorebolbok songni VEC Secretary Jewilson Sangma aro Bajengdoba Police Station ni ning·o ga·akgipa songni Sordar Laston Momin saksa Rilipson Marak jean da·o Chennai o kam ka·engachim uni bimingo death certificate ko tarie uni hajirani tangka ko bikote cha·enga ine Social Activist Greneth M. Sangma agangaha.
Koborrangko man·soani gitade Rilipson Marak ni jikgipa uni segipani tange dongpaenganiko janapangaha jean Chennai chi re·angna skang job card nigita kamrangko ka·e hajira man·paa ine u·iatangaha. Iani bidingo dosi dakgipa manderangsa tol·e death certificate ko taridrae tangka ko cha·rikskaenga aro uamangni indake kam ka·aniara dal·begipa dos dakani ong·a ine Sangma agandapangaha.
Ia obosto ko niate Jewilson Sangma aro Laston Momin ni kosako badi ka·dochina aro uamangni dos dakani kri sasti ko on·chinaba North Garo Hills ni Deputy Commissioner na chitti ko see mol·molangaha.
