Da·al salo Tura-ni DC Park-o gnigipa changna ong·atenggipa Me·gong International Literary Festival 2024-ko Education Minister Rakkam Sangma oprake on·angaha. Ia literary fest-ko dingtang mancha A·chik jatni ku·sikko, sea jotanirangko aro dakarikaniko mesokna miksongani gnang NEHU Tura campus-ni Garo Department, A·chik Literature Society aro Don Bosco College Tura bakrime ong·atenga. Ia program-ona, Rangsakhona-ni MLA Subir Marak, Executive Chairman MBOSE Tura C P. Marak , A·chik Literature Society-ni member-rang, Bangladesh, Tripura, Karbi Anglong aro Assam a·dokoni okamata man·giparang, NEHU-ni chatro chatrirang bakko ra·angtokaha.
Education Minister, Rakkam Sangma, literary fest-ko ong·atgipa aro on·gilgiparangko mittelapilaniko dakange A·chikrangni ku·sik aro sea jotanirangko mikkang chasongona ripingna nangani gamchataniko tom·anio aganangaha. Ua lekka kingsaoni segimin kattako ra·e chong·motan ia chasongo ma·sigiminko da·alo bon·ataigija re·baenggipa chasongna ripingna nanganiko manderangna aganparakangaha. An·ching sakantian an·tangtangni ma·sigiminrangko mikkangchini chasongni namgnina skirikrikangna aro on·rikrikanga nanga ine Sangma aganangkuaha.
Gnigipa salo, sea jotanirango chong·motan poetry seanio on·gilani aro samtangtango donggipa buring bolgrimrangni bidingo Apurbo M. Marak, Regional Director, Caritas Mymensingh Region Bangladesh, Tura Baptist Church-ni Retd. Pastor Rev. Dr. Wetterfield R Marak, Don Bosco Junior college Tura-ni Principal Rev. Fr (Dr.) Jogesh B Sangma aro A·chikkuchi lekka segiparang baksa golpogrikanirangko dakanggen. Folklore aro Education, Poetry-ko mesokani aro Folklore project-ni bidingo chanchirimanirangba donggen.
