SGH a·jao Darengre-oni Durabanda-ona dakanggipa Km 5.160-ko tarianio mitam kamrangko ka·changalanina Nokrek Area Development Committee, Sangknigre police thanao PWD (Road) Officer aro contractor-rangni kosako badi ka·doangaha. Ia ramako tarianio dolongko tarigipa bosturang gimaaniko aro retaining wall donggijaniko uamangko mokordomao segatangaha.
Chainagre-oni 2850 m (approx) mangni chelako Nano Technology-ko jakkale a·ako jetaniko chamatgimingita aro toani record-nigita name ka·jaha. Committee-ni u·iatanigitade, contractor ong·gijagipa a·a jetani record-ko on·aha aro una gong 55 lakh-ko on·manaha ine parakataha. Unbaksanaba, retaining wall-rangko tarijaha aro gong lakh 5,80,000 ko contractor-na gamanaha ine uamang u·iataha.
Iasan ong·aigija, dolong tarianio nangggipa bosturang jekai Approach Slap, curtain wall, flexible appron aro rong nonganirang dongjaenganiko Nokrek Area Development Committee u·iataha. Indake ong·genchimoba, measurement ki·tapode ia gimaenggipa kamrangko tol·e segatmanaha ine uamang janapataha. Iarang pilakan RTI ka·anio department-ni parakatgiparang ong·a jekon contractor aro PWD officer-ni kosako raka ja·kuko de·china committee parakataha.
