West Garo Hills, Tura-o mijal salni bako DRDA conference hall-o National Constitution Day-ko gisik ra·aniko dakangaha. India-ni constitution-ko 1949 bilsini November 26 tariko ra·gataha jean pilak niam bikdikrangni rongdik ong·a.
Ia salko gisik ra·anio a·jani DC Jagdish Chelani, SP Abraham T. Sangma, ADC aro gipin officer-rangni dongpaanio a·songni preamble-ko mingangaha. Deputy Commissioner tom·anio aganengon constitution-ko taria bilsi 75 gapaniko janapange constitution-ko ra·gatanichi a·songko re·dilna dakchakenganina uni dal·bea mande ra·aniko parakangaha. Constitution-an a·songko dilenggipa, tang·doanina re·mikkangdilgipa aro tom·tomani ja·pang ong·a ine Chelani aganangaha.
Ia somoio West Garo Hills a·jani District Police, Border Security Force (BSF), State Disaster Response Force (SDRF), MPS Priyanka W. Sangma, IPS Ishan Gupta, IPS Naman Kumar aro IPS Saurav Kr Saini, iamangko kamtango jaksrame dangdike on·anina India-ni constitution-ni bilsi 75 gapaniko gisik ra·agita mande ra·aniko dakangjolaha.
