Chri gosusaani trial cum coaching session ko da∙al saloni Monfort Centre for Education, Tura-o West Garo Hills Archery Association ong∙atangenga. Ia training camp-ko West Garo Hills Archery Association dingtang mancha District Sports Office, Tura baksa bakrime da∙al sal December 2 tarik oni December 7 tarikona ong∙atanggen jekon West Khasi Hills ni saksa professional coach B. Lyngkhoi ni dilanio bak ra·giparangna nanggipa aro chugipa gadangni skie ra·na nangchongmotgiparangni bidingo skianiko on·anggen.
Skanggipa salo sak 92 manderang ia kal·susaani a·bao gisik nangbee bak ra∙aniko nikangna man∙aha. Association-ni President Dolrich Berin G. Momin ni ku·pattianichi ia program ko a·bachengatangaha jeon Vice President Rupanker K. Marak, Secretary Melky Chisim, aro Association ni gipin memberrangba dongpae bakko ra·angtokaha.
Chri gosusaanio changgipa aro sapgiparangko name dake ma·sie ra·na nangchongmotaniko aro somoi man·mitingon an·tangtangna nambata cholrangko dake ra·chinaba President didiangaha. Ian chri gogiparangna skanggipa ja·ku de·ani ong·a jeon ia a·bao sapgiparangna chu·sokna aro joltangna mikkim rasongko ra·bana dakchakani ong·gen ineba Momin aganangaha.
Jemangan chri goanio gisik nangbee an·tangtangko on·kange skina sikgiparangna knal saloni chotchanggija trainingrangko saksa sapgipa Coach Lyngkhoi ni dilanio skie ra·na cholko man·anggen.
Ia ong∙atenggipa camp-o bilsi 14 ba batgiparang bakko ra∙na man∙angenga jeon uamangna nambata gadangko on∙e chri goani bidingoba skie ra∙ani cholko on∙agita association-ni miksongani ong∙a ine parakangaha. Re∙baenggipa Meghalaya Games 2025 jekon Jowai songjinmao ong∙atnasienggipao chri gosusana sapgiparangko nirikite seokaniko dakanggen ineba u·iatangaha.
