Gambegre bye election-ko NPP doloni Dr. Mehtab Chandee Sangma cheani ja·mano Garo Hills jolni MLA-rang MDA 2.0 o cabinet-ni biapko ra·dapna nangnikaniko parakangtokaha. Ia cheaniko ra·e NPP dol da·o sak 32 MLA-ona sokdoangaha jeoni sak 19 mangde Garo Hills-onin ong·a.
Koborrangko man·soanigitade Garo Hills-na cabinet-ni biapko on·skae UDP ba HSPDP-ni Minister Shakliar Warjri-ni biapo rim·napskachina MLA-rangni nangnikaniko u·iana man·aha. Chu·gimik ge 12 cabinet biaprangoni MDA sorkario NPP dolni sak 8 Minister-rang gnang, chong·motan sak 4 Garo aro sakbri Khasi-Jaintia na tikataha. Uandake bakrimgipa HSPDP aro UDP dolrangnaba sakgniprak dake cabinet-ko sualaha.
Indake ong·genchimoba Chief Minister Conrad Sangma, iani bidingo aganengon NPP dolni gisepo da·o dipet golpoanirang dongkuja aro maming dakeba MDA 2.0 o tikatgimin cabinet-ni biaprangko nosto ka·na nangnikja ine parakangskaaha.
NPP dolrang Garo Hills-o chu·gimik 24 seat-oni sak 19 MLA-rang aro Khasi-Jaintia Hills-ni dam 36 dingtang dingtang constituency-rango sak 13 MLA-rang gnang.
