South Garo Hills, Rongara Block-ni ning·o donggipa Gulpani Nokat songo Meghalaya Basin Management Agency, Ashoka India, IKEA Foundation aro songdongenggipa manderangni bimchipe dakchakanichi processing unit-ko “A∙bani” nigita a·bachengatna man·aha. Ia processing unit-ko bilsi gnina rakbee kamrangko ka∙e jotton ka·ani ja∙mano 2023 bilsini December 8 tariko oprakaniko dakangaha.
India a∙songni sapgipa architechrang jean Avneesh Tiwari aro Neha Rane-ni jotton ka·e kamko ka·anichi a·gilsak gimikni nambatsranggipa ge 15 project-rangni gadangona sokdoangaha. Ian a·gilsak gimikoni ge·sa mingsingbegipa aro gitchambatgipa London-ni songbad o parakatange ia sakgni architechrangko International award-naba biming minge donangaha.
Ia processing unit-o songni me·chik dolrangni gita skanggipa tarigimin bostu jekon ta·bolchu-oni tarigimin ginchiko jinmana a·bachengate on·a man∙angaha. Apsan daken mikkangchi Garo Hills-o man∙gipa dingtang dingtang biterangoniko bostu tarina miksonganikoba janapangaha. Indakgipa processing unit-ko songadam nokadamona ra∙bana man∙anian songsalni manderangna kam on∙a dakchakan baksana ge∙e game cha∙giparangnaba uamangni biterangko altubate aro kragipa damrango palna dakchakaniba ong∙a ine u∙ina man∙aha.
