Da·al salo, South West Garo Hills a·jao Rerapara C&RD Block-ni ning·o man·gipa Dobol Lake English School-o International Day of Persons with Disabilities-ko gisik ra·e maniangaha. Ia program-ko Ampati-ni District Social Welfare Officer-ni office ong·ataha jeon a·jani dingtang dingtang biaprangoni sak 180 mang be·ennigita bilgriani ba chu·onggijani donggiparang sokbae bakko ra·angtokaha.
Program-ona Melim PHC-ni Senior Medical and Health Officer I/c, Dr. Norimchi R. Marak mongsonggipa ong·e sokbaaha. Ua program-o aganengon be·en bimangni naljokanina rongtal an·tale dongchina sokbagiparangko didiangaha. A·gilsak gimiko PwD ba be·ennigita bilgrianiko man·giparangni population-ko Legal cum Probation Officer, DCPU Ampati, Tanya Derimchi Ch. Marak talatangskae manderangko PwD certificate-rangko aro sorkarini on·enggipa namgnirangko ra·china didiangaha. Unbaksana, uamangko on·cheparangoni naljokna niamo on·gimin bilrangni bidingoba aganangjolaha.
Program-ni bako be·ennigita bilgriani donggipa saksa Salen Marak, kamrangko man·a uni an·tangni neng·nikanirangko chagronganiko jinmana parakangaha. Ua dingtang mancha PwD category-na reservation-ko 4% ko donchina aro cholrangko ra·bachina daito gnanggiparangko mol·molangaha.
Ia manianio kal·anirangkoba ong·atangaha aro chegiparangna boksisrangkoba sualangaha. Gipin bakko ra·giparangnaba ka·saani chingita boksisrangko apsan on·angaha aro koros nanga gri be·en bimangko porikka ra·e niangaha. .
