Mijal salo Tura Danakgre-ni BSF Combined Hospital-o 200 Bn BSF baksa Tura Civil Hospital-ni Blood Bank nangrime Blood Donation Camp-ko ong·atangaha. Ia Blood Donation Camp-o sak 28 BSF-rangoni an·chirangko on·gilaniko dakanichi hospital rangna aro bang·a manderangni gamchatbegipa janggirangko jokatna dakchakani ong·anggen.
Hospital-rango sanna bannaniko dakmiting somoio an·chi chimongchakramo an·chirangni bon·changani a·selo kenani aro jajrenganiko man·ronga. Indake an·chirangko on·gilanichi surgery, sagipa manderangko sanna bannaniko dakna an·chirangko nanggitikani somoioba namgnirangko ra·baani ong·enga ine Dr. LN Chembok aganangaha. Program-ni bako an·chirangko on·gilaniko dakjringna aro rang·gitik an·chirangko nangani somoio on·a man·ani giminba mikrakataniko on·angjolaha.
Blood donation camp-ko chu·sokatna man·anina 200 Bn BSF dolrang an·chi on·gile dakchakgipa, nitimgiparangko aro Sr. M& HO, Dr. Dimpu R Marak, Dr. Shemida K. Marak, Dr. Kennelworth R. Marak aro Tura Civil Hospital, Blood Bank-o kam ka·rimgiparangko mittelpilskaniko dakangaha. BSF dolrang mikkangchiba ia blood donation camp-rangko ong·ate an·seng baljoke donganina dakchakna miksonganikoba aganangaha.
