Mijal salo Garobadha Bazaar Committee aro A·chik Conscious Holistically Integrated Krima (ACHIK) dol bakrime Garobadha anti jolo donggipa biaprangko rongtal an·talataniko dakangaha. Ia rongtalanio bang·a songni nokni manderang, Garobadha thanani In-charge Selestine Ch. Momin, Garobadha PHC-ni Dr. Angeline S. Marak, songsalni dilgiparang, ACHIK dol, pagitcham ma·gitchamrang aro chadamberang gisiko nange bakko ra·angtokaha.
Rongtalaniko dingtang mancha plastic-rangko name tale galna, jabolrangko nama biapo galchakna aro noksam nokgilrangko rongtale rakkina mikrakaniko ra·bana miksonganio ong·atangaha. Chadamberangba iano bakko ra·e antidamni wilwila biaprangko rongtalatangaha jeon plastic-ko chang·sasan jakkalna aro rongtal an·tale rakkianina an·tangtangni daitotangko namen mesokangaha.
ACHIK dolni Co-chairman Brejio Marak, sokbae bakko ra·giparangko mittelpilaniko dakange ia rongtalaniko dakanian skanggipa an·ching sakprakonin a·bachenganiko gisik ra·atani ong·a ine aganangaha.
