Da·al salo, Ampati-ni Multi-facility Centre-o ‘Science and Technology for a Sustainable Future’ katta bichongko ra·e wilwilao donggipa school bi·sarangna District Level Science, Mathematics, aro Environment Exhibition-ko DSEO South West Garo Hills ong·atangaha. Ia exhibition-ko dambe gisikrangko mikkangchina baikamgipa chanchianirangko neng·nikani somoirango bikotna aro dingtang dingtang cholrangko am·sandina man·giparang ong·chinagita miksonge ong·ataha.
Exhibition-ona SWGH, Ampati Government Higher Secondary School-ni Principal Chingky G. Momin mongsonggipa ong·e sokbaaha.
Ia exhibition-o bak ra·giparang chu·gimik school ge 8 mang gnang jeon uamang an·tangtangni changa sapa aro science-ni a·bao ma·sianiko project-ko ka·anio mesokangaha.
Susagipa school-rangoni skanggipa biapko Ampati Government Higher Secondary School-ni class IX ong·gipa Nogrim G. Momin man·aha. Gnigipako, Harishanti Niketan Vidyalaya Secondary School-ni class VIII ong·gipa Tanbeer Mehtab aro gittamgipako St. Claret Higher Secondary School, Ampati-ni Class VIII-o poraienggipa chatri Riddhima Hajong man·angskaaha.
Che·gipa school-rang Shillong songjinmao ong·nasienggipa State Level Science Exhibition-o SWGH a·jani palo bakko ra·na seoka man·aha jeon uamang a·dokni bang·a chatro chatrirang baksa susaanggen.
