Mijal sal December 9 tariko Williamnagar, East Garo Hills o District Level Education Committee (DLEC) tom∙aniko dake a∙doko poraia skiani bidingo nipiltaianiko dake adita chanchirimaniko dakangaha. Ia tom∙anio DSEL & SPD aro SSA-o kam ka∙gipa officialrang bakko ra∙angtokaha.
A∙dokni pilak a∙jarango poraia skiani bidingo nipiltaianiko dakna aro nambatatani cholrangko ra∙bana DLEC ge∙sa mongsonggipa committee ong∙e kamrangko ka∙angenga. Uamangni tom∙anio a∙doko poraia skiani a∙bako namdapatna pilak nanggnigipa kamrangko ka∙angchinagita daito donggipa sakantikon didiangaha.
Ia tom∙aniko dakani ja∙mano DSEL & SPD aro SSA nigita East Garo Hills o dingtang dingtang bida pakwatramni rika cho∙anirangko nirokangan baksa Williamnagar Govt HS School aro EMRS ni gitalgipa buildingrangkoba re∙ange nirokangaha.
