North Garo Hills, Mendipathar-oni sakgni manderang Assam ramao truck gari baksa a·sel ong·e a·damon siaha. Ia a·sel mijal attamo Boko Police thanani ning·o man·gipa Paneri songo ong·aha.
Boko Police-ni u·iatanigitade, sianggipa sakgniko cycle-tangko tarie re·bamiting somoio truck gari (WB59D1465) su·gakeaha ine u·ina man·aha. Bilongbee saknaa man·ani a·selo uamang sakgni a·damon janggi galaha. Police-rang ia ong·a obostaona bikan sokange manggisirangko ra·eha aro truck-ko rimnapaha ine koborna parakataha.
Sianggipa sakgni chatchi nanggrikgiparangan ong·a jemangan Chaygaon Industrial Growth Centre-o kam ka·enggiparang aro uamangni bimingko Therang Sangma aro Ishak Sangma ine u·ina man·aha. Da·al salo police-rang manggisirangko Guwahati Medical College Hospital-ona post-mortem ka·na watatgen.
