Chang gnigipa Wangala Festival 2024-ko All Assam Garo Cultural Society (AAGCS) Bakrapur-ni kal·chakramo December 27 oni 28 tarikona ong·atangaha. Ia manianiko Assam-ni Education & Tribal Affairs Minister Dr. Ranoj Pegu-ni jakchi oprakatangaha aro bilsirikit November jani 7 tarikko Wangala manina donahanina uko mande ra·pilanikoba dakangaha. Maniani bako Assam-o songdongenggipa Garo jatrangni neng·nikanirang aro nangenggiparangko janape Minister-na memorandum-koba on·angjolaha.
Uamang-ni memorandum-o janapgimingita, chong·motan Garo medium school-rango Teacher Eligibility Test (TET) rangko dingtangmancha dakchina, ge·gni HE school-ko Higher Secondary-ona ra·dochina, Garo-rangni donggipa biaprango English medium school donggiparangko CBSE course-o napate Class X ona ra·dodapchina aro Tourist cum A·chik Heritage site-rangko namdapataniko dakchina aro gipin mol·molanirangko Dr. Ranoj Pegu ta·rake nirokatna aganangaha. Unbaksana, Bakrapur-o auditorium-ko riknagita Crore 1 tangka paisarangko chamatna miksonganikoba ua parakangaha.
Program-ni bon·kamgipa salo Assam Legislative Assembly-ni Deputy Speaker Dr. Numal G. Momin mongsonggipa ong·e sokbaaha. Una agreba Mining Development Corporation-ni Chairman aro MLA Remington G. Momin, Meghalaya aro Assam-ni NGO dilgiparangba dongpae bakko ra·angtokaha.
