January 7 tarik, Mongolbar pringni 11:32 mangni somoio Tura Bazaar o mande sakgni dakgrikanio chakkuchi su·a man·e saksa siaha. Ia koborko man·ani bakan Tura Police dolrang a·sel ong·gipa biapona sokangaha.
Police rangni u·iatani gitade Assam a·dokni Sukchar South Salmara Hajirhat songni bilsi 24 ong·gipa Minurul Islam uni mamatang Jaha Uddin ko Tura Super Market-o chakkuchi su·e donanga ine ma·sina man·aha. Su·a man·gipa mandeko Tura Civil Hospital-ona sanna rimangenchimoba bilongbee saknaako man·e janggiko gimaataha.
Ia a·sel ong·aniara uamangni business ka·ani bidingo jegrike ong·angaha ine ong·naba donga ine u·iatangaha aro dosi dakgipa mandeko police dolrang rim·angaha ineba koborna parakataha.
