Game cha∙giparangna dingtang mancha bading chiwalaniko aro uamangni gamgimin biterangko nambate palna man∙agita mijal salni Cabinet tom∙anio CM ASSURE scheme ko a∙bachengatna ra∙chakangaha. Ia scheme nigita chongipa gadango ge∙e game cha∙giparangko dakchake on∙a aro bite rangni damrang tang∙onmiting somoio bajar antirango kragipa damrango palnagita dakchakani cholko ra∙bana miksongenga.
Ia scheme na a∙dok sorkari dingtang mancha gong 100 crore ko chamataha aro gong 20 crore ko ma∙mong sorkarini Ministry of Tribal Affairs nigita dakchakaniko on∙angskagen.
Ge∙e game cha∙giparangko dakchakna a∙dok sorkarinigita dingtang dingtang cholrangko ra∙bae dakchakaniko dakangenga jeon ia CM ASSURE scheme nigita simu, gue aro gipin biterangko sorkarian bree namgipa damo palangskagen ine Chief Minister Conrad Sangma aganangaha. Bajar antirango kragipa damrango palna neng∙nikmiting somoirango, game cha∙giparangna ia scheme nigita dakchakaniko on∙a man∙angskagen ineba Chief Minister agandapangaha.
