Meghalaya a·doko poraia skiani a·bako namdapatna gitalgipa Captain Williamson Sangma State University ko ra·baanina mittelan baksana University ko kragipa bewalo chalaina man·agita aro nangchongmotgipa kamrangko ka·china Garo Students’ Union, Central Executive Committee (CEC) HQ. Tura dolrang Chief Minister Conrad K Sangma, Education Minister Rakkam Sangma aro University-ni Vice Chancellor na memorandum ko on·angaha.
India a·songni Constitution ni Article 46 o dingtang mancha Scheduled Caste aro Scheduled Tribe rangna poraia skiani man·aniko tang·doatna aro ong·gija kamrangoni naljokatna segatgimingita kamrangko ka·na nanganiko GSU janapangaha.
Ia niamrango pangchake dingtang mancha Meghalaya-o songdongenggipa manderangna mikkang nitegija apsangrik ong·e cholko ra·bana dakchakna state reservation policy ko ia gitalgipa State University-o ra·gatna nanganiko uamang janapataha. Unbaksana Captain Williamson Sangma State University-ni pilak teaching aro non-teaching bakrangni kamna rimnapanio ia policy ko kakket ong·e ja·rike Garo na 40%, Khasi-Jaintia na 40%, Other Scheduled Castes & Scheduled Tribes (SC/ST) na 5% aro General Category na 15% reservation rangko done kam ka·china a·dok sorkariko mol·molangaha.
Kamrangna rimnapaniko mikkang nitegija kakketgipa bewalo aro maming neng·nikagri ka·na man·agita roster system ko ra·gatchina sorkariko didiangaha. Adita teaching aro non-teaching bakni kamrangna rimnapanio bilsi 50 ko batbegipa donchinaba janapangaha.
Una agreba undergraduate aro postgraduate programrangna admission ka·anio state reservation policy ko ja·rike mongsongbate Garo, Khasi, aro Jaintia jatrangni candidate rangko seokchina GSU dol aganangaha. Reservation policy aro roster system ko ra·gatanio dingtang mancha kam ka·aniko nirokna committee ko songchinaba uamang janapataha. Iako janapan baksana kamrangko kragipa bewalo ka·na man·chinagita committee-o adita jatrangni manderangko seokchinaba GSU mol·molangaha.
