Songsalko namdapatna South West Garo Hills-o skanggipa changna Community Managed Training Centre (CMTC) ko da·al salni bako Betasing Block-ni ning·o man·gipa Godalgre songo a·bachengataha. Ia training centre-ko chasong gitalni kri skie ra·ani aro training-ni cholrangko a·jao donggipa manderangna namgipa cholko on·a miksonge bikotaha. CMTC dingtang mancha Meghalaya State Rural Livelihoods Society-ni dakchakanichi Unity Cluster Level Federation Women SHG Members Multipurpose Co-operative Society Ltd-ni chalaienggipa ong·a.
Nayak mongsonggipa sokgipa ong·e CMTC-ko oprake on·aha. Unbaksa gipin sokgiparangara SWGH a·jani ADC MCS R. Z. D shira, Betasing Block-ni BDO MCS Crystal Ripamchi N. Sangma, Godalgre songni Nokma aro Block-ni ning·o donggipa Self-Help Group (SHG) rang bakko ra·angaha.
Hema Nayak program-o aganengon a·jao namgipa training centre dongani namgniko janapangaha aro CMTC ko ra·baanichi chadamberangni changa sapaniko baridapatna dakchakani ong·gen ine aganangaha. Dal·dalgipa su·sana nanggipa porikkarangna aro kamna nanga u·i ma·sianirangko namdapatna basic computer training-ko on·china Nayak didiangaha.
CMTC-o sak 30 mangnigita bakko ra·giparangko sokachakna biap donga, ge·gni training hall, dormitory, cha·chakram, resource person-rangna dongchak bamchakna kutturi aro staff-na office-rang gnang. Ia center-ko SGH-ni kamrangnasan jakkalaijawa indiba tangka paisa on·e gipin department ba gipin organization-rangba jakkalnagita man·gen.
CMTC-ko name chalaina man·agita sak dok personnel-rangchi nirokatgen jeon manager, coordinator, accountant aro security staff-ba donggen.
