West Garo Hills, Rengmagre-oni Jerom M. Sangma, Young Stars Cricket League-o kal·na seokako man·aha. Sangma, re·anggipa bilsini October jani 22 tarikoni Guwahati-o CSCL trail-ko on·e da·o namgipa gadango seokako man·e January 20 tarikoni Delhi-o ong·nasienggipa Young Stars Cricket League 2025-o kal·na a·bachenggen.
Jerom Sangma, saksa batsman ong·a aro ua Indian Rhinos dolo kal·na Assam a·dokni palo cholko man·aha. Ia YSCL 2025-o gipin a·dokrangoni seoka man·gipa dolrang jekai Indian Storms, Indian Warriors, Indian Daredevils, Indian Catamounts, Indian Thunder aro uandake gipin seoka man·gipa dolrang susaanggen.
Sangma, Ku·rongdik baksa golpoanio dingtang mancha una namgipa cholko on·anina nokgipako demittelangaha. Una agreba uni mikkangchi re·mikkanganio chu·sokgipa ong·chinagita missionary-rangko dilenggipa father-rang, pamongrang aro jatska manderangko una nama skaniko on·e bi·chakchina mol·molangaha.
