Re·baenggipa January 25 tarikoni Meghalaya aro Bengal, BCCI-ni U-23 Col CK Nayudu Trophy 2024-25 na kal·aniko skanggipa changna Tura-ni Alotgre Cricket kal·chakramo kal·atanggen ine Meghalaya Cricket Association (MCA) parakataha.
Ian Meghalaya Cricket Association aro Tura District Cricket Association-ni ru·uta bilsirangoni BCCI tournament-ko Garo Hills-ona ra·bana miksonge donganiko chu·sokatna man·aha ine MCA aganangaha. Indakgipa gadangni match ko Garo Hills-o ra·bana man·anian cricket kal·na gisiko nanggipa chadamberangko bimchipna aro jotton ka·batna dakchakani ong·gen ineba Meghalaya Cricket Association aganangaha.
Ia match aro re·baenggipa February 1 tariko Vidarbha baksa Nagpur o kal·na gitaba player rangko seokangaha. Alotgre kal·chakramo kal·nasienggipa Khasi aro Jaintia Hills-oniko Shillong Polo Ground-o sokate January 22 tarikni pring 6 bajioni Tura-ona re·chakatbagen aro Garo Hills-ni bakrangoni re·baenggiparangde Tura-ona joljol re·baskana man·gen ine MCA aganangaha.
Meghalaya dolni Bengal aro Vidarbha baksa kal·na seoka man·giparangara Kevin S Christopher (C), Manish Sharma (VC), Rohit Kr Yadav, Sachin Kumar(WK), Abhishek Kumar, Kush Agarwal, Gavineal J Marpna, Bipin Kr Ray, Josiah Momin, Swastic Chettri, Bharat Gurung, Gulgul M Sangma, PM Santhosh, Thunun Marak (WK) aro Argeas Cham Cham Sangma ong·a.
Standby-na Joydeepan Deb, Purav Agarwal, Avinash Rai, Banialam Mylliemngap, Navin K Rai aro dakchakna gita Neetesh Sharma (Head Coach), Synrapsing Riahtam (Assistant Coach), Emidao Dhar (Physio), Skhembor Khongbtep (Trainer) aro Chuba R Marak (Manager) ong·skaa.
