Atchidaldal bi·sarang ma·apani simsakaniko sal 1000-na chong·motan bilsi 3-na chu·onge man·agita ‘1000 Days for Every Child’ project-ko a·dok sorkari bikotaha. Health Minister, Dr. Ampareen Lyngdoh, iani bidingo talatengon bi·sani mikkangchi janggi tanganio ia bilsigittam cha·a ringanio simsakna nanggipa aro gamchatbegipa ong·a ine aganangaha.
Sorkarini program-rang jekai vaccination aro immunization-ko ja·rikna nangani gamchatanikoba ua media orientation program-o parakangaha. Ia program-ko bi·sani an·seng baljokani aro a·doko immunization-ko dakani bidingo Guwahati Centre for Development & Peace Studies, UNICEF baksa bakrime kobor ra·timgiparangna ong·atangaha jeon Dr. Ampareen project-ni gimin talatangjolaha.
Ia project-o pangchake sal 1000-na skang ma·gipa gipin bi·sako ba·taia ong·ode birth certificate on·aniko dontongatnaba Dr. Ampareen u·iataha. Ian dingtang mancha ma·aparang bi·sana simsakaniko ma·sichina aro nokdango bi·sarangko nirokanio galchangjachinagita sal 1000-ko ma·aparangna on·a sorkari miksongaha.
Dongenggipa health centre-rangna bate bang·a Health and Wellness Centre-rangko ra·badapna sorkarini chanchigiminrangkoba Dr. Ampareen parakangaha. Sorkarini re·mikkanganio Infant Mortality Rate (IMR) ko tang·onatna aro IMR-ko Zero-ona ra·bana kam ka·angkugen ine ua aganangkuaha. Unbaksana, vaccination ba sabisioni naljokna biji su·aniko daknaba bang·a changchianirang aro miksonganirang gnang ine Lyngdoh parakangjolaha.
