Selsella-ni NGO dolrang NH 127B rama tarianio compensation man·a nanggnirangko a·a nokgiparangna kraa bewalo on·china Revenue Department-nigita nirokatchina West Garo Hills ni Deputy Commissioner-na chittiko sedoataha.
NH 127B project-ni kamrangko ka·anio ge·e game chagipa a·arang, bite gnanggipa bolrang aro dokanrangni nisiatako man·giparangna Right to Fair Compensation and Transparency in Land Acquisition, Rehabilitation and Resettlement Act, 2013-nigita a·a nokgiparangna gamna nanganirangko tiktak ong·e on·a nanganiko NGO dolrang aganangaha.
Section 26 and Section 30 of the RFCTLARE Act 2013-nigita dongimin a·a rangni damo pangchake apsangrik ong·e gamna nanga ine NGO dolrang janapataha. Unbaksana, ia Act-o nigita bol bipangrang, mi misirang aro gipin gamchatgipa bosturang donganiko nigrikesa tangka gamna nanggen ineba aganangaha.
Bite gnanggipa bolrang jekai gue, komila-rangna tangka gong hajal 50 oni lakh sa-ona aro bite grigipa bolrangna tangka gong hajal 10 oni hajal 50 ona on·china NGO dolrang aganangaha.Dokanrang jekai chongipa dokanrangna (100 sq.ft ong·gipana) tangka gong lakh 2 oni lakh 5-ona on·china, bijangchi ong·gipa dokanrangna (100-500 sq.ft ong·gipana) tangka gong lakh 5 oni lakh 20 ona, dal·gipa dokanrangna (500 sq .ft batgiparangna) tangka gong lakh 20 oni lakh 50 ona on·china gita NGO dolrang aganangaha.
Right to Fair Compensation and Transparency in Land Acquisition, Rehabilitation and Resettlement Act, 2013-nigita a·a nokgiparangna uamangni man·a nanggnirangko tiktak dake on·china NGO dolrang Deputy Commissioner-o mol·molangaha.
