A∙chik Baptist Krima-1 ni chang 131-gipa Annual General Meeting (ANM) ba tom∙bimonganiko Nogolpara Baptist Mondolio skanggipa changna sokachake re∙anggipa January 23 tarikoni ong∙ate da∙alo bon∙kame manianiko dakangaha. Ia maniaona A∙chik Baptist Krima-1 ni ge 32 Mondolirang ba sokbae bakko ra∙angtokaha.
Ia tom∙bimonganiona sokbagipa ABDK-1 ni Padot, Executive Secretary, ABDK-1 staffrang, Mondoli ge∙antini Pamong aro delgaterangko Nogolpara Baptist Mondolinigita rimchaksoani kattarangko on∙angaha.
Ia sal 4 ni manianio A∙chik Baptist Krima-1 nigita adita chanchirimaniko dake, Bible study rangko ong·ate giljarangkoba ka∙angaha. Tom∙anio mongsonggipa ong∙e aganprakna ABDK ni Deputy Director of Mission Jamesh D. Marak aro Jangseng D. Sangma ko seokange uamangni ku·rangchi Isolni namgipa kattarangko skiprakangaha.
Ia maniao Praise and Worship ko dilgiparang toromni gitrangko ring∙e tom∙aniona sokbagipa sakantikon an∙saodilangaha. Dingtang dingtang Mondolini Choir rangba bakko ra∙pae uamangni knatobegipa ku∙rangrangchi Isolko de∙mittele ring∙e mesokangaha.
Ia tom∙bimongani bon∙kamgipa sal jean Januray 26 tarik, Robibar salo Garo Hills ni dingtang dingtang biaprangoni aro Assam a·dokni manderang re∙bae ku∙cholsan bakko ra∙angtokaha.
