Chang 76 gipa Republic Day ko Tura Matchakolgre L.P skul ni kal∙chakram biapo da∙al salo manianiko dakangaha. Ia manianiona a∙dokni Chief Minister Conrad Sangma mongsonggipa sokgipa ong∙e bakko ra∙ange a∙songni nisanko badalate on∙angaha. Sangma ia maniani bako a∙dokna dingtang dingtang rika cho∙ani kamrangko chu∙sokatna man∙ani bidingo aganangaha.
Chief Minister ni minute 40 na agananio, a·dokni dingtang dingtang biaprangona apsangrik ong·e silroroaniko ra·bana kamrangko ka·enga ine janapangaha. A·dokni GDP ko 2028 bilsio 10 billion US dollar economy ona tang·doatna bang·a rika cho·ani aro nanggipa kamrangko ka·enga jekon nipilatgenchimode FY-15 o crore Rs 23,235 ong·gipaoni FY-24 o crore 53,057 ona GDP ko bariatna man·aha ine Sangma aganangaha.
A·dokko tang·doatnagipa kamrangara rama, housing, water supply, power, tourism, aro IT sector ong·a ineba Sangma parakangaha. Iarangko mongsonggipa kam ong·a ine ma·sien a·doko re·anggipa bilsi 5 rango km 2,500 na baten PMGSY nigita tariangaha. Rama jal·rangko namdapatna re·anggipa bilsi 2-o km 568 na bate taridapna sorkari tangka paisrangko chamataha ine aganan baksana Shillong-Dawki Highway aro Tura-Dalu ramarangko tarienganiko parakataha.
A·dokni pilak bakrangona namgipa rama jal·angrangko on·agita Garobadha-Dalu Road, Pasyih-Garampani Road, Umling-Patharkhmah Road, aro Umsning-Jagi Road koba tariangenga ine Sangma aganangaha. Unbaksana rama jal·angrangko tarianio a·dokni namgipa kamrangna ma·mong sorkari crore 2,500 tangka paisarangko chamdapataha ineba CM aganangaha.
Ia project nigita km 300 na bate double lane ramarangko ‘Mission 10’-o pangchake kamrangko ka·na miksonganikoba Chief Minister parakataha. Iana agreba a∙dokko tang∙doatna gipin a∙barangko namdaptna kam ka∙na miksonganikoba Sangma tom∙bagipa sakantinan u∙iatangaha.
Apsan daken a∙dokni gipin a∙jarangoba ia Republic Day ko katchabee maniangaha.
