U-23 men’s Col CK Nayudu Trophy 2024-25 ko Tura Alotgre o kal·atgipao Bengal dolrang Meghalaya dolko wicket 9 chi nengrabee amchepanga.
Ian Tura-o skanggipa changna BCCI ni match ko sokachakchenggipa ong·a aro Tura District Cricket Association ni bimchipe kam ka·anchi ia kal·ataniko chu·sokatna man·angaha. Ru·uta sal somoirangonin MCA nigita ia nambegipa kal·chakram biapo cricket match rangko ong·atna manchiani dongaha jekon MCA ni President Nababrata Bhattacharjee ni dilanio TDCA ni member rang aro kam ka·giparang gisik nangbee ka·anganchi da·alo ia kal·susaaniko name matchotatna man·aha.
Ia kal·susaani gnigipa salo Meghalaya ni Chief Minister Conrad Sangma ba sokbae bakko ra·angaha.
Ian dingtang mancha Garo Hills-ni sports ni a·bana rasong chabeani ong·an baksana cricket kal·na gisik nanggipa chadamberangko didiatani ong·a ine Chief Minister aganangaha. Unbaksana ia kal·chakram biapko namgipa gadangni rika cho·ani aro nangchongmotgipa bosturangko jakkalanina BCCI, CAB (Cricket Association of Bengal) aro MCA ko CM de·mittelangaha. Ia gadangni match ko ra·bana man·anian Garo Hills na rasong chabeani ong·a aro mikkangchiba indakgipa kal·susaani rangko niksona ka·dongsoenga ineba CM aganangaha.
Ia kal·anio Meghalaya dolrang dokchenge skanggipa innings-o 133 run ko man·e chu·gimik wicket rangko ga·akataha jeon Bengal 225 run rangko man·angskae 92 run rangchi Meghalaya na bate dongsoaha. Gnigipa innings-o Meghalaya 100 run mangmangkosan man·e run 9 kosan Bengal dolrangna nisan tarina man·aha jekon wicket 1 kosan ga·akate Bengal nengrabee cheaha.
Meghalaya dolrang bon·kame Vidarbha baksa Nagpur-o February jani 1 tariko kal·angskagen.
