Da·al salo, WGH Selsella CHC-o 100 Days Campaign-ko District Tuberculosis (TB) Centre, Tura ong·atangaha.
Tom·anio, Dr. Riksilchi Sangma, sokbagiparangko rimchaksoenba TB biati saani chin, saatgipani ja·pang aro naljokani bidingo mikrakaniko on·angaha. Sangma, 100 Days Campaign-ni miksonganiko talatange, ia camp-ko uamangni CHC-rango maina aro sana ong·atenga, uni namgniko aganangaha.
Ian sanna bannaniko namdapatna mongsongbate bilsi 60 aro una batgiparang, jemangan saa man·a altugiparang jekai diabetes, HIV aro gipin biatirangko man·giparangna koros nanga gri Xray, Sputum Test, BP, RBs, CY-TB Test-rangko dakna man·gen ine Sangma aganangaha. Ua manderangna gusuao dakna nanganirangkoba dakmesoke on·angaha aro sakantikon Nikshay Mitra ong·e TB sagiparangna dakchakchina didiangaha.
Tom·aniona, Selsella Constituency-ni MLA Arbinstone Marak mongsonggipa ong·e sokbaaha. Ua sakanti songni manderangko ia namgipa cholko ra·china didiangaha. TB sabisi man·giparang namnamgipa cha·anirangko cha·na nangan baksana songsalni aro nokdangoni chakpaaniko nanga ine aganangkuaha. Songni nokni dilgiparang jekai Nokma Sardar-rang, VHC member-rang aro gipinrangkoba 100 Days TB Elimination camp-o bakko ra·china didiangaha.
